امریکا کی اسرائیل کو میزائل سسٹم کے لیے 600 ملین ڈالر کی نئی امداد

Sat 24 May 2014

(ایجنسیز)

امریکی کانگریس نے اسرائیل کے لیے چھ سو ملین ڈالر کی مزید دفاعی امداد کی منظوری دی ہے۔ یہ رقم صہیونی ریاست کو فلسطینی مزاحمت کاروں کے توڑ کے لیے بنائے گئے میزائل شکن سسٹم"آئرن ڈوم"، میجک وینڈ [جادو کی چھڑی] اور طویل فاصلے تک مار کرنے والے "ایرو3" کو اپ گریڈ کرنے کے لیے استعمال کی جائے گی۔

مرکز اطلاعات فلسطین کے مطابق اسرائیل کے لیے دفاعی شعبے میں امداد کی تجویز گذشتہ کئی ہفتوں سے
ایوان میں زیربحث تھی، جسے ایک روز قبل منظور کر لیا گیا ہے۔

کانگریس کے حالیہ اجلاس میں یہ طے کیا گیا ہے کہ امریکی صدر ہر تین ماہ میں اسرائیل کی دفاعی ضروریات کا جائزہ لینے اور حسب ضرورت صہیونی ریاست کو امداد فراہم کرنے کا پابند ہو گا۔

امدادی بل کی منظوری کےبعد میڈیا سے گفتگو کرتے ہوئے ارکان کانگریس کا کہنا تھا کہ واشنگٹن اسرائٰیل کی تمام دفاعی ضروریات پوری کرنے کا پابند ہے۔ اسرائیلی ریاست کو درپیش سیکیورٹی چیلنجز کا ہر سطح پر مقابلہ کیا جائے گا اور تل ابیب کو ان چیلنجز سے

نمٹنے کے لیے بھرپور امداد فراہم کی جائے گی۔

میڈیا رپورٹس کے مطابق امریکی ایوان نمائندگان کی جانب سے منظورہ کردہ نئی دفاعی امداد میں سے 351ملین ڈالر"آئرن ڈوم" سسٹم کو اپ گریڈ کرنے کے لیے استعمال کی جائے گی۔ یہ سسٹم مختصر اور درمیانے فاصلے تک مار کرنے والے راکٹوں اور میزائلوں کو ان کے ہدف تک پہنچنے سے پہلے تباہ کرنے کی صلاحیت رکھتا ہے۔

اس کےعلاوہ 268.7 ملین ڈالر کی رقم سے "میجک وینڈ" سسٹم کی اپ گریڈیشن کی جائے گی۔ یہ سسٹم طویل فاصلے تک مار کرنے والے میزائلوں کو تباہ کرنے کی صلاحیت رکھتا ہے۔ باقی ماندہ رقم سے اسرائیل کے"حیٹس[ایرو3] راکٹوں اور بیلسٹک میزائلوں کی تیاری میں استعمال کی جائے گی۔

مبصرین کے خیال میں امریکا کی جانب سے اسرائیل کے لیے دفاعی اور میزائل ٹیکنالوجی کے شعبے میں دی جانے والی تازہ امداد دراصل تل ابیب کو ایران کی جانب سے درپیش خطرات پر مطمئن کرنا ہے۔ تاہم امریکی کانگریس کی جانب سے دفاعی امداد کی منظوری کے ضمن میں ایسا کوئی اشارہ نہیں دیا۔

فیس بک پر شیئر کریں! ٹویٹر پر ٹویٹ کریں

اس پوسٹ کے لئے کوئی تبصرہ نہیں ہے.

تبصرہ کیجئے